अहेरी : तालुक्यातील मरपल्ली व भस्वापूर येथील शाळेजवळील हनुमान मंदिराच्या नूतन बांधकामाचा भूमिपूजन सोहळा वैदिक मंत्रोच्चारात भक्तिमय वातावरणात उत्साहाने पार पडला. गावात सुसज्ज हनुमान मंदिर उभारण्यात यावे, अशी मागणी येथील नागरिकांनी काही दिवसांपूर्वी केली होती. ग्रामस्थांच्या या मागणीची दखल घेत महाराष्ट्र प्रदेश काँग्रेस कमिटीचे महासचिव तथा गडचिरोली जिल्हा परिषदेचे माजी अध्यक्ष डॉ. अजयभाऊ कंकडालवार यांनी गावाला भेट देऊन नागरिकांशी संवाद साधला होता.
यावेळी त्यांनी शासनाच्या सध्याच्या नियमांनुसार मंदिर बांधकामासाठी थेट शासकीय निधी उपलब्ध करून देणे तात्काळ शक्य नसल्याचे स्पष्ट केले होते. मात्र, ग्रामस्थांच्या धार्मिक भावना आणि श्रद्धेचा आदर राखत, स्वतःच्या खर्चातून हनुमान मंदिर बांधून देण्याचा शब्द त्यांनी दिला होता. दिलेल्या शब्दाची पूर्तता करण्याच्या दिशेने पाऊल टाकत डॉ. अजय कंकडालवार यांनी मंदिराच्या बांधकामाचे भूमिपूजन केले. त्यांच्या या निर्णयामुळे मंदिर उभारणीच्या कामाला प्रत्यक्ष सुरुवात झाली आहे.
मरपल्ली व भस्वापूर ही आदिवासीबहुल भागातील गावे असून, प्रस्तावित हनुमान मंदिर ग्रामस्थांसाठी श्रद्धेचे केंद्र बनण्यासोबतच सामाजिक व सांस्कृतिक एकोप्याचे ठिकाण ठरणार आहे. ग्रामस्थांच्या मागणीला सकारात्मक प्रतिसाद देत स्वखर्चाने मंदिर उभारण्याचा निर्णय घेतल्याबद्दल नागरिकांनी डॉ. अजय कंकडालवार यांचे आभार मानले. त्यांच्या या पुढाकाराचे आणि दिलेला शब्द पाळण्याच्या भूमिकेचे परिसरात कौतुक होत आहे.
या भूमिपूजन सोहळ्याला गावातील ज्येष्ठ नागरिक, महिला, युवक तसेच काँग्रेसचे स्थानिक पदाधिकारी आणि कार्यकर्ते मोठ्या संख्येने उपस्थित होते. लवकरच मंदिराचे बांधकाम पूर्ण करून मूर्तीची प्राणप्रतिष्ठा करण्यात येणार असल्याचे यावेळी सांगण्यात आले. त्यामुळे मरपल्ली व भस्वापूर येथील ग्रामस्थांमध्ये आनंदाचे वातावरण असून, मंदिराच्या उभारणीकडे सर्वांचे लक्ष लागले आहे.
