वाचनातून ज्ञान, बचतीतून शिस्त; ताटीगुडम शाळेत विद्यार्थ्यांसाठी मार्गदर्शन

ताटीगुडम : जिल्हा परिषद उच्च प्राथमिक शाळा, ताटीगुडम येथे विद्यार्थ्यांमध्ये वाचनाची आवड निर्माण व्हावी तसेच बँकिंगविषयी जागरूकता वाढावी, या उद्देशाने वाचन व बँकिंग जनजागृती उपक्रम राबविण्यात आला. या उपक्रमांतर्गत बँक ऑफ इंडिया, कमलापूर शाखेचे शाखा अधिकारी यांनी शाळेतील विद्यार्थ्यांशी संवाद साधून बँकिंगविषयक विविध बाबींची सोप्या आणि रंजक पद्धतीने माहिती दिली.

यावेळी शाखा अधिकाऱ्यांनी बँकेची कार्यपद्धती, पैशांची बचत करण्याचे महत्त्व, आर्थिक शिस्त आणि बँकेच्या विविध सेवांविषयी विद्यार्थ्यांना मार्गदर्शन केले. तसेच विद्यार्थ्यांच्या शैक्षणिक प्रगतीसाठी बँकेमार्फत उपलब्ध असलेल्या विविध योजना व सुविधांची माहिती देत आर्थिक साक्षरतेचे महत्त्व पटवून दिले. या संवादामुळे विद्यार्थ्यांना बँकिंग क्षेत्राची प्राथमिक माहिती मिळण्यास मदत झाली.

विद्यार्थ्यांमध्ये वाचनाची गोडी निर्माण व्हावी आणि त्यांच्या शैक्षणिक वाटचालीला प्रोत्साहन मिळावे, या हेतूने शाखा अधिकाऱ्यांनी विद्यार्थ्यांना पुस्तके व पेन भेट दिले. या उपक्रमातून विद्यार्थ्यांना वाचनाचे महत्त्व समजण्यासोबतच नियमित अभ्यास, ज्ञानार्जन आणि बचतीची सवय यांविषयी सकारात्मक संदेश मिळाला. विद्यार्थ्यांच्या सर्वांगीण विकासासाठी अशा उपक्रमांचे महत्त्व यावेळी अधोरेखित झाले.

‘वाचनातून ज्ञान, बचतीतून शिस्त आणि शिक्षणातून उज्ज्वल भविष्य!’ या संदेशातून उपक्रमाचा उद्देश प्रभावीपणे व्यक्त झाला. विद्यार्थ्यांना बँकिंगविषयक माहिती देऊन त्यांच्या शैक्षणिक प्रगतीसाठी प्रेरणा दिल्याबद्दल जिल्हा परिषद उच्च प्राथमिक शाळा, ताटीगुडम यांच्या वतीने बँक ऑफ इंडिया, कमलापूर शाखेचे मनःपूर्वक आभार व्यक्त करण्यात आले. या उपक्रमामुळे विद्यार्थ्यांमध्ये वाचन, बचत आणि शिक्षणाविषयी अधिक जागरूकता निर्माण होण्यास निश्चितच मदत होणार आहे.

शिवसैनिकांमध्ये उत्साहाचे वातावरण; आलापल्ली शहरात पक्षाच्या फलकांचे अनावरण

आलापल्ली : गडचिरोली जिल्ह्यातील अहेरी तालुक्यातील आलापल्ली शहरातील विविध प्रमुख चौकांमध्ये शिवसेना (उद्धव बाळासाहेब ठाकरे) पक्षाच्या वतीने पक्षाच्या फलकांचे अनावरण करण्यात आले. आलापल्ली शहरात प्रथमच अशा स्वरूपात पक्षाचे फलक लावण्यात आल्याने स्थानिक शिवसैनिक व कार्यकर्त्यांमध्ये उत्साहाचे वातावरण निर्माण झाले.

शिवसेना पक्षप्रमुख उद्धव बाळासाहेब ठाकरे तसेच युवा सेनाप्रमुख आदित्य उद्धव बाळासाहेब ठाकरे यांच्या मार्गदर्शनाखाली पक्षाची संघटनात्मक बांधणी अधिक मजबूत करण्याच्या उद्देशाने हा उपक्रम राबविण्यात आला. शिवसेना लोकसभा संपर्कप्रमुख महेश केदारी यांच्या प्रमुख उपस्थितीत तसेच शिवसेना जिल्हाप्रमुख दिलीप भाऊ सुरपाम यांच्या उपस्थितीत शहरातील विविध ठिकाणी पक्षाच्या फलकांचे अनावरण करण्यात आले.

आलापल्ली शहर व परिसरात शिवसेनेची संघटनात्मक ताकद वाढविण्यासोबतच नागरिकांच्या विविध प्रश्नांना वाचा फोडण्यासाठी पक्षाच्या माध्यमातून सक्रियपणे काम करण्याचा निर्धार यावेळी व्यक्त करण्यात आला. तसेच जनसामान्यांच्या समस्या प्रशासनापर्यंत पोहोचवून त्यावर योग्य तो पाठपुरावा करण्यासाठी शिवसैनिकांनी एकजुटीने कार्यरत राहण्याचे आवाहन करण्यात आले.

या फलक अनावरण कार्यक्रमाला विभागप्रमुख सचिन सलामे, आकाश तुमडे, संजय फुलोर, राकेश आत्राम, सागर गोंगले, तिरुपती रामगिरवार, व्यंकटेश बंदूकवार, विजय वानखेडे, वसंत आलाम यांच्यासह शिवसेनेचे पदाधिकारी, शिवसैनिक व कार्यकर्ते मोठ्या संख्येने उपस्थित होते. त्यांच्या उपस्थितीमुळे कार्यक्रमाला उत्स्फूर्त प्रतिसाद मिळाला.

नन्हे सितारे विभागीय स्पर्धेत लोक बिरादरीचे सात विद्यार्थी चमकले

भामरागड : आदिवासी विकास विभागांतर्गत ओपन लिंक फाऊंडेशनच्या माध्यमातून राबविण्यात येणाऱ्या ‘नन्हे सितारे’ उपक्रमाच्या विभागीय स्पर्धेत लोक बिरादरी आश्रमशाळा, हेमलकसा येथील विद्यार्थ्यांनी उल्लेखनीय कामगिरी केली. ३० सप्टेंबर २०२६ रोजी शासकीय आश्रमशाळा, कवडस, ता. हिंगणा, जि. नागपूर येथे झालेल्या या स्पर्धेत एकात्मिक आदिवासी विकास प्रकल्प, भामरागड अंतर्गत लोक बिरादरी आश्रमशाळेचे आठ विद्यार्थी सहभागी झाले होते. त्यापैकी तब्बल सात विद्यार्थ्यांनी विविध स्पर्धांमध्ये प्रावीण्य मिळवत आपल्या शाळेचा नावलौकिक वाढविला.

आदिवासी विद्यार्थ्यांमधील इंग्रजी संवादकौशल्य, आत्मविश्वास, सर्जनशीलता आणि सार्वजनिक सादरीकरणाची क्षमता विकसित करण्याच्या उद्देशाने ‘नन्हे सितारे’ उपक्रम राबविण्यात येत आहे. नागपूर विभागातील विविध एकात्मिक आदिवासी विकास प्रकल्पांतर्गत येणाऱ्या शासकीय व अनुदानित आश्रमशाळांमधून इयत्ता पहिली ते आठवीतील विद्यार्थ्यांची निवड करण्यात आली होती. प्रत्येक प्रकल्पातून ११ ‘नन्हे सितारे’ विद्यार्थ्यांची निवड करून त्यांना आपली कला व प्रतिभा सादर करण्यासाठी हे व्यासपीठ उपलब्ध करून देण्यात आले. त्याच उपक्रमांतर्गत कवडस येथे विभागीय स्पर्धेचे आयोजन करण्यात आले होते.

लोक बिरादरी आश्रमशाळेच्या विद्यार्थ्यांनी विविध गटांमध्ये उल्लेखनीय यश संपादन केले. इयत्ता पहिली ते तिसरी गटात कथा सादरीकरणात समीक्षा नितीन मायनाळे हिने तृतीय, तर कविता सादरीकरणात अनन्या बाबुराव कोंडागुर्ले हिने तृतीय क्रमांक मिळविला. इयत्ता चौथी ते पाचवी गटात कथा सादरीकरणात कार्तिक प्रकाश सोयाम याने प्रथम, स्पोकन इंग्लिशमध्ये काव्यांजली दशरथ कोरेत हिने प्रथम, कविता सादरीकरणात शर्मिला मूरा आत्राम हिने द्वितीय, तर स्पेलिंग बीमध्ये नविना राजू कुरसामी हिने तृतीय क्रमांक मिळविला. इयत्ता सहावी ते आठवी गटात कविता सादरीकरणात तनुजा सुधाकर तोप्पा हिने प्रथम क्रमांक पटकावला.

या यशाबद्दल प्राविण्यप्राप्त विद्यार्थ्यांसह त्यांना मार्गदर्शन करणारे शिक्षक सुरेश गुट्टेवार, तुषार कापगते, विजया किरमिरवार, हिना गुट्टेवार, निर्मला सिडाम, रंजना सडमेक व मोनिका येजुलवार यांचे अभिनंदन करण्यात आले. विद्यार्थ्यांच्या या उल्लेखनीय कामगिरीबद्दल मुख्याध्यापक गिरीष कुलकर्णी, शरीफ शेख तसेच शिक्षक व शिक्षकेत्तर कर्मचाऱ्यांनी विद्यार्थ्यांचे कौतुक करून पुढील वाटचालीस शुभेच्छा दिल्या. या यशामुळे लोक बिरादरी आश्रमशाळा, हेमलकसा तसेच भामरागड आदिवासी विकास प्रकल्पाच्या शैक्षणिक क्षेत्रातील कामगिरीला नवी झळाळी मिळाली आहे.

गडचिरोलीच्या शिक्षणाची राष्ट्रीय भरारी! शिवणीपाठ शाळेची यशोगाथा NIEPAच्या राष्ट्रीय पोर्टलवर

गडचिरोली : दुर्गम, नक्षलग्रस्त आणि आदिवासीबहुल अशी ओळख असलेल्या गडचिरोली जिल्ह्याने शैक्षणिक गुणवत्तेच्या जोरावर राष्ट्रीय पटलावर नवी ओळख निर्माण केली आहे. शालेय नेतृत्व विकास कार्यक्रमांतर्गत (२०२५-२६) महाराष्ट्रातील निवडक १०० शाळांच्या यशोगाथा, ९ शैक्षणिक मॉड्यूल्स आणि ३ शाळांच्या व्हिडिओ डॉक्युमेंटरी NIEPA (National Institute of Educational Planning and Administration) आणि NCSL (National Centre for School Leadership), नवी दिल्ली यांच्या राष्ट्रीय पोर्टलवर प्रकाशित करण्यात आल्या आहेत. या प्रतिष्ठेच्या यादीत अहेरी तालुक्यातील बोरी केंद्रांतर्गत येणाऱ्या जि. प. प्राथमिक शाळा, शिवणीपाठ या शाळेने स्थान मिळविले आहे.

अत्यंत प्रतिकूल परिस्थितीतही विद्यार्थ्यांच्या सर्वांगीण विकासासाठी तसेच शैक्षणिक गुणवत्तावृद्धीसाठी शिवणीपाठ शाळेने विविध नाविन्यपूर्ण उपक्रम राबविले. मुख्याध्यापक श्री. रविंद्र रत्नाकर यमसलवार यांच्या प्रभावी नेतृत्वाखाली आणि सहकारी शिक्षिका श्रीमती सुरेखा मेश्राम यांच्या सहकार्याने शाळेत विविध शैक्षणिक प्रयोग राबविण्यात आले. कल्पकता, सातत्य आणि जिद्दीच्या बळावर शाळेने केलेल्या या शैक्षणिक वाटचालीची दखल थेट नवी दिल्लीतील राष्ट्रीय स्तरावरील संस्थांनी घेतली आहे.

महाराष्ट्रातील निवडक १०० यशस्वी शाळांमध्ये अहेरीसारख्या अतिदुर्गम भागातील शिवणीपाठ शाळेचा समावेश होणे ही गडचिरोली जिल्ह्यासाठी अभिमानाची बाब ठरली आहे. ग्रामीण व आदिवासी भागातील विद्यार्थ्यांना उपलब्ध मर्यादित साधनसुविधांमध्येही गुणवत्तापूर्ण शिक्षण देता येते, हे या यशोगाथेने अधोरेखित केले आहे. गडचिरोलीच्या जिद्दीला मिळालेली ही राष्ट्रीय पावती असून हे यश केवळ एका शाळेचे किंवा शिक्षकाचे नसून जिल्ह्यातील शिक्षकांच्या मेहनतीचे, समर्पणाचे आणि शिक्षणाप्रती असलेल्या निष्ठेचे प्रतीक आहे.

राष्ट्रीय स्तरावर गडचिरोलीचे नाव उज्ज्वल केल्याबद्दल मुख्याध्यापक रविंद्र रत्नाकर यमसलवार आणि सहकारी शिक्षिका सुरेखा मेश्राम यांचे जिल्हाधिकारी, जिल्हा परिषद मुख्य कार्यकारी अधिकारी, शिक्षणाधिकारी, गटशिक्षणाधिकारी, केंद्रप्रमुख, शिक्षकवर्ग तसेच स्थानिक नागरिकांकडून अभिनंदन करण्यात येत आहे. शिवणीपाठ शाळेच्या या उल्लेखनीय यशामुळे जिल्ह्यातील इतर शाळांनाही शैक्षणिक गुणवत्ता, नाविन्यपूर्ण उपक्रम आणि प्रभावी शालेय नेतृत्वासाठी नवी प्रेरणा मिळाली आहे.

गडचिरोलीत सांस्कृतिक गणेशोत्सवाचा जल्लोष; विविध कलाविष्कारांनी जिंकली रसिकांची मने

गडचिरोली : महाराष्ट्र शासनाचा सांस्कृतिक कार्य विभाग, सांस्कृतिक कार्य संचालनालय आणि जिल्हा प्रशासन गडचिरोली यांच्या संयुक्त विद्यमाने आयोजित ‘गणेशोत्सव सांस्कृतिक कार्यक्रम’ समाजकल्याण विभागाच्या सभागृहात उत्साहपूर्ण वातावरणात पार पडला. ‘आपली कला, आपली संस्कृती, आपली ओळख आणि आपला अभिमान’ या भावनेतून आयोजित या कार्यक्रमात कला, संस्कृती, श्रद्धा आणि एकतेचा सुंदर संगम अनुभवायला मिळाला. कार्यक्रमाची सुरुवात मंगलमय वातावरणात भावपूर्ण गणेश आरतीने करण्यात आली.

यानंतर स्थानिक कलाकारांनी विविध कलाविष्कार सादर करून उपस्थित रसिकांची मने जिंकली. प्रतीक भाईसारे याने ‘सूर निरागस’ या लोकप्रिय भक्तिगीतावर सादर केलेल्या सोलो नृत्याला उत्स्फूर्त दाद मिळाली. श्री गुरुदेव स्वरसाधना भजन मंडळ, गडचिरोली यांच्या भक्तिमय भजनांनी सभागृह भक्तिरसात न्हाऊन निघाले. चिमुकली साहित्या हिने ‘हे धरती हे अंबर तुझे गुण गाती’ या गीतावर सादर केलेल्या मनमोहक नृत्यानेही उपस्थितांची वाहवा मिळवली.

कार्यक्रमात सनराईज गरबा क्लास, गडचिरोली यांच्या चमूने सादर केलेल्या उत्साही गरबा नृत्याने विशेष रंगत भरली. युवा गायक कल्याणी आणि महेश यांनी सादर केलेल्या सुश्राव्य भक्तिगीतांनी वातावरण प्रसन्न केले. तसेच उपस्थित प्रेक्षकांसाठी आयोजित रंजक प्रश्नमंजुषा स्पर्धेलाही उत्स्फूर्त प्रतिसाद मिळाला. विविध कलाप्रकारांच्या सादरीकरणामुळे संपूर्ण कार्यक्रमाला उत्सवाचे स्वरूप प्राप्त झाले.

यावेळी अतिरिक्त जिल्हाधिकारी नितीन गावंडे, जिल्हा नियोजन अधिकारी प्रसाद घाडगे, सामाजिक न्याय विभागाचे सहायक आयुक्त डॉ. सचिन मडावी, उपजिल्हाधिकारी स्मिता मोरे, उपजिल्हाधिकारी स्मिता बेलपत्रे यांच्यासह प्रशासनातील विविध विभागांचे अधिकारी व कर्मचारी उपस्थित होते. तसेच गडचिरोली शहरातील नागरिक, महिला आणि युवा वर्गाने मोठ्या संख्येने सहभाग घेतला. स्थानिक कलाकारांच्या सुप्त कलागुणांना व्यासपीठ उपलब्ध करून देणाऱ्या या उपक्रमाचे उपस्थितांकडून कौतुक करण्यात आले.

गुणवत्तापूर्ण शिक्षणासाठी उपसंचालकांची धडक मोहीम; दुर्गम शाळांना भेटी देत विद्यार्थ्यांशी साधला संवाद

गडचिरोली : शालेय शिक्षण विभागाच्या ‘चला शाळेला जाऊ या’ या विशेष उपक्रमांतर्गत नागपूर विभागाच्या शिक्षण उपसंचालक माधुरी सावरकर यांनी २२ व २३ सप्टेंबर रोजी गडचिरोली जिल्ह्याचा दोन दिवसीय दौरा केला. या दौऱ्यात त्यांनी दुर्गम भागातील विविध शाळांना प्रत्यक्ष भेटी देऊन शैक्षणिक गुणवत्ता, विद्यार्थ्यांची प्रगती तसेच पायाभूत सुविधांची पाहणी केली. मुलचेरा तालुक्यातील सुंदरनगर, आष्टी यासह परिसरातील शाळांना भेट देताना त्यांनी वर्गखोल्यांमध्ये विद्यार्थ्यांशी संवाद साधून त्यांचे वाचन, लेखन व गणितीय कौशल्य तपासले.

दौऱ्याच्या दुसऱ्या दिवशी अहेरी तालुक्यातील इंदाराम येथील कस्तुरबा गांधी बालिका विद्यालयाला त्यांनी भेट दिली. यावेळी विद्यार्थिनींची शैक्षणिक गुणवत्ता, निवास व भोजन व्यवस्था तसेच सुरक्षिततेच्या उपाययोजनांचा आढावा घेत त्यांनी विद्यार्थिनींशी आपुलकीने संवाद साधला. शालेय पोषण आहार, विद्यार्थ्यांची उपस्थिती, डिजिटल शिक्षण आणि भौतिक सुविधांचीही त्यांनी बारकाईने पाहणी करून आवश्यक त्या सुधारणा करण्याच्या सूचना संबंधित अधिकाऱ्यांना दिल्या.

यानंतर नागेपल्ली (आलापल्ली) येथील सेंट फ्रान्सीस इंग्लिश मीडियम स्कूलमध्ये शिक्षण उपसंचालक माधुरी सावरकर यांच्या अध्यक्षतेखाली भव्य शैक्षणिक आढावा सभा घेण्यात आली. यावेळी जिल्हा परिषदेचे माध्यमिक शिक्षणाधिकारी वासुदेव भुसे, प्राथमिक शिक्षणाधिकारी प्रेरक उजागरे, DIET गडचिरोलीचे प्राचार्य चापले यांच्यासह अहेरी, सिरोंचा, भामरागड, एटापल्ली व मुलचेरा या पाच तालुक्यांचे गटशिक्षणाधिकारी, विस्तार अधिकारी, केंद्रप्रमुख, साधन व्यक्ती तसेच विविध व्यवस्थापनांच्या माध्यमिक व उच्च माध्यमिक शाळांचे मुख्याध्यापक मोठ्या संख्येने उपस्थित होते.

सभेत पाचही तालुक्यांतील शैक्षणिक प्रगती, १०० टक्के पटनोंदणी, विद्यार्थ्यांची गळती रोखणे आणि शासनाच्या विविध शैक्षणिक उपक्रमांच्या प्रभावी अंमलबजावणीचा आढावा घेण्यात आला. “दुर्गम व आदिवासी भागातील प्रत्येक घटकापर्यंत दर्जेदार व गुणवत्तापूर्ण शिक्षण पोहोचवणे हेच आपले मुख्य ध्येय असून, संपूर्ण पर्यवेक्षीय यंत्रणा व मुख्याध्यापकांनी समन्वयाने आणि सक्रियतेने कार्य करावे,” असे आवाहन माधुरी सावरकर यांनी केले. त्यांच्या या दौऱ्यामुळे दक्षिण गडचिरोलीतील शैक्षणिक व्यवस्थेला अधिक गती मिळण्यासोबतच शिक्षक व शिक्षण विभागातील अधिकाऱ्यांमध्ये नव्या उत्साहाचे वातावरण निर्माण झाले.

रस्ता, वीज, नेटवर्क अन् पुलियांच्या समस्यांनी ग्रामस्थ त्रस्त; अजयभाऊ कंकडालवार यांचा आंदोलनाचा एल्गार

गडचिरोली : अहेरी तालुक्यातील अतिदुर्गम व आदिवासीबहुल भागातील सुध्दागुडम ते मरपल्ली रस्ता शासनाने आठ वर्षांपूर्वी मंजूर करूनही अद्याप प्रत्यक्ष काम सुरू झालेले नाही. त्यामुळे परिसरातील सुध्दागुडम, मरपल्ली, रेगुलवाही व करंचा या गावांतील नागरिकांमध्ये तीव्र नाराजी निर्माण झाली आहे. रस्त्याबरोबरच अनियमित वीजपुरवठा, मोबाईल नेटवर्कचा अभाव आणि जीर्ण पुलियांच्या समस्यांमुळे नागरिकांना मोठ्या अडचणींचा सामना करावा लागत आहे.

या प्रश्नांकडे प्रशासनाचे लक्ष वेधण्यासाठी महाराष्ट्र प्रदेश काँग्रेस कमिटीचे महासचिव तथा माजी जिल्हा परिषद अध्यक्ष डॉ. अजय कंकडालवार यांनी आक्रमक भूमिका घेतली आहे. त्यांच्या नेतृत्वात समस्त ग्रामस्थांच्या वतीने ५ ऑक्टोबर २०२६ रोजी उमानूर मेन रोड चौक येथे शांततामय चक्काजाम आंदोलन करण्यात येणार आहे. याबाबतचे निवेदन अजय कंकडालवार यांनी उपविभागीय अधिकारी तथा दंडाधिकारी, अहेरी यांच्याकडे सादर केले आहे.

सुध्दागुडम, मरपल्ली, रेगुलवाही आणि करंचा या गावांना तालुक्याच्या ठिकाणाशी जोडणारा हा प्रमुख मार्ग आहे. रस्ता मंजूर होऊन निधीची तरतूद झाल्याचे नमूद करण्यात आले असतानाही काम रखडल्यामुळे नागरिकांचे हाल होत आहेत. पावसाळ्यात रस्त्यावर चिखल व दलदल निर्माण होत असल्याने शाळकरी विद्यार्थ्यांना, रुग्णांना तसेच गरोदर महिलांना प्रवास करताना मोठ्या अडचणींचा सामना करावा लागतो. शेतकऱ्यांनाही शेतमाल बाजारपेठेत नेणे कठीण होत असल्याची तक्रार आहे.

परिसरातील वीजपुरवठ्याची समस्याही गंभीर असल्याचे निवेदनात नमूद करण्यात आले आहे. वारंवार वीज खंडित होणे, कमी दाबाचा वीजपुरवठा आणि जुन्या विद्युत वाहिन्या व ट्रान्सफॉर्मरमुळे नागरिकांना त्रास सहन करावा लागत आहे. त्याचबरोबर मोबाईल नेटवर्कची सुविधा उपलब्ध नसल्याने आपत्कालीन परिस्थितीत रुग्णवाहिका, पोलीस किंवा इतर यंत्रणांशी संपर्क साधण्यात अडचणी येतात.

करंचा आणि रेगुलवाही येथील नाल्यांवरील पुलिया जीर्ण व धोकादायक झाल्याचा आरोपही ग्रामस्थांनी केला आहे. तसेच मरपल्ली ते रेगुलवाही रस्त्याचे काम निकृष्ट दर्जाचे झाल्याचा दावा करण्यात आला असून त्याची उच्चस्तरीय चौकशी करण्याची मागणी करण्यात आली आहे. या सर्व प्रश्नांवर तातडीने उपाययोजना करण्याची मागणी ग्रामस्थांनी केली आहे.

अजय कंकडालवार यांनी प्रशासनाला इशारा देताना सांगितले की, गेल्या अनेक वर्षांपासून या प्रश्नांसाठी तोंडी व लेखी पाठपुरावा करूनही ठोस कार्यवाही झालेली नाही. ५ ऑक्टोबरपर्यंत मागण्यांवर ठोस कार्यवाही न झाल्यास हजारो ग्रामस्थांसह चक्काजाम आंदोलन करण्यात येईल, असे त्यांनी निवेदनातून स्पष्ट केले आहे. आंदोलन शांततामय मार्गाने करण्यात येणार असून कायदा व सुव्यवस्थेचा प्रश्न निर्माण होणार नाही, याची दक्षता घेतली जाईल, असेही निवेदनात नमूद करण्यात आले आहे. आंदोलनाची माहिती पोलीस प्रशासनाला देण्यात आली आहे.

आंदोलनाच्या पार्श्वभूमीवर सुध्दागुडम-मरपल्ली रस्ता तातडीने सुरू करणे, अनियमित वीजपुरवठा सुरळीत करणे, मोबाईल नेटवर्क सुविधा उपलब्ध करणे, करंचा व रेगुलवाही येथील जीर्ण पुलियांचे नवीन बांधकाम करणे आणि मरपल्ली-रेगुलवाही रस्त्याच्या निकृष्ट कामाची चौकशी करून दोषींवर कारवाई करणे, या प्रमुख मागण्या करण्यात आल्या आहेत. या आंदोलनाला परिसरातील सरपंच, उपसरपंच, ग्रामपंचायत सदस्य, शेतकरी संघटना, विद्यार्थी संघटना आणि ग्रामस्थांनी पाठिंबा दिल्याचे निवेदनात नमूद आहे.

‘आदिवासी रूट्स अँड रेसिपी’तून शेकडो महिलांना रोजगाराचा आधार

आलापल्ली : दुर्गम व आदिवासी भागातील महिलांना आर्थिकदृष्ट्या स्वावलंबी करण्यासाठी आणि त्यांच्या पारंपरिक कौशल्यांना बाजारपेठ उपलब्ध करून देण्यासाठी मियाम चॅरिटेबल ट्रस्टने महत्त्वपूर्ण पुढाकार घेतला आहे. ट्रस्टच्या सर्वेसर्वा नितू जोशी यांच्या संकल्पनेतून राबविण्यात येत असलेल्या ‘आदिवासिया – रूट्स अँड रेसिपी’ या उपक्रमाच्या माध्यमातून शेकडो आदिवासी महिलांना पारंपरिक खाद्यपदार्थ निर्मितीचे व्यावसायिक प्रशिक्षण देण्यात आले असून, त्यांना रोजगाराच्या संधी उपलब्ध करून देण्याचा प्रयत्न सुरू आहे.

आलापल्ली येथील भव्य मैदानावर आयोजित करण्यात आलेल्या ‘रेसिपी प्रदर्शनाला’ नागरिकांचा उत्स्फूर्त प्रतिसाद मिळाला. या प्रदर्शनातून दुर्गम भागातील महिलांनी तयार केलेल्या पारंपरिक व पौष्टिक खाद्यपदार्थांची शहरी बाजारपेठेशी ओळख करून देण्यात आली. महिलांनी तयार केलेले विविध प्रकारचे लाडू, चिवडा, चकली, शंकरपाळे तसेच स्थानिक मसाल्यांसह विविध पारंपरिक खाद्यपदार्थ प्रदर्शनात विक्रीसाठी ठेवण्यात आले होते.

आदिवासी भागातील पारंपरिक खाद्यपदार्थांना नैसर्गिक चव, पौष्टिकता आणि घरगुतीपणामुळे मागणी वाढत आहे. मात्र, योग्य मार्गदर्शन, पॅकेजिंग आणि बाजारपेठेच्या अभावामुळे या पारंपरिक उत्पादनांना व्यापक व्यावसायिक संधी मिळत नव्हती. ही बाब लक्षात घेऊन मियाम चॅरिटेबल ट्रस्टने महिलांना पदार्थ निर्मितीबरोबरच स्वच्छता, आकर्षक पॅकेजिंग, उत्पादनाचे सादरीकरण आणि विक्री व्यवस्थापनाचे प्रशिक्षण दिले आहे. त्यामुळे त्यांच्या पारंपरिक कौशल्याला व्यावसायिक स्वरूप मिळण्यास मदत होत आहे.

“दुर्गम भागातील महिलांमध्ये प्रचंड कौशल्य आणि मेहनत करण्याची तयारी आहे. गरज आहे ती केवळ त्यांना योग्य दिशा आणि संधी देण्याची,” असा विश्वास ट्रस्टच्या सर्वेसर्वा नितू जोशी यांनी व्यक्त केला. या उपक्रमामुळे अनेक महिलांना स्वतःच्या कौशल्यातून उत्पन्न मिळविण्याची संधी निर्माण झाली असून, त्यांच्या कुटुंबाच्या आर्थिक परिस्थितीलाही हातभार लागत आहे. पारंपरिक खाद्यसंस्कृतीचे जतन करत महिलांना रोजगार व स्वावलंबनाची दिशा देणाऱ्या मियाम चॅरिटेबल ट्रस्टच्या या उपक्रमाचे विविध स्तरांतून कौतुक होत आहे.

भगवंतराव आश्रमशाळेच्या देव गोंगलेचे प्रज्ञाशोध परीक्षेत घवघवीत यश

गडचिरोली : मॉडर्न एज्युकेशन सोसायटीतर्फे २५ एप्रिल २०२६ रोजी राणी दुर्गावती कन्या शाळेत घेण्यात आलेल्या महाराष्ट्र प्रज्ञाशोध परीक्षेत (MTS) भगवंतराव प्राथमिक तथा माध्यमिक आश्रम शाळा, राजाराम (खां) येथील इयत्ता आठवीचा विद्यार्थी देव मधुकर गोंगले याने जिद्द, मेहनत आणि सातत्यपूर्ण अभ्यासाच्या जोरावर घवघवीत यश संपादन केले.

देव हा सामान्य शेतकरी कुटुंबातील विद्यार्थी असून त्याला आई लताबाई मधुकर गोंगले व वडील मधुकर गोंगले यांचे सातत्यपूर्ण मार्गदर्शन लाभले. त्याचे वडील राष्ट्रीय युवा ग्रामीण पत्रकार संघाचे जिल्हाध्यक्ष आहेत. देवच्या शैक्षणिक वाटचालीत जिल्हा परिषद उच्च प्राथमिक शाळेतील इयत्ता चौथीचे शिक्षक रामदास उघाडे यांनी गणित विषयाचे भक्कम मार्गदर्शन केले. त्यानंतर जि. के. मडावी सर यांनीही गणित विषयात सातत्याने मार्गदर्शन केले. गणित हा देवचा आवडता विषय असून त्याने या विषयात नेहमीच चांगली कामगिरी केली.

देवने आपल्या यशाचे श्रेय आपल्या गुरुजनांसह मार्गदर्शक इंदाराम येथील मामा इम्रानखान पठाण आणि फरीन इम्रानखान पठाण यांना दिले आहे. सुख-दुःखाच्या प्रसंगी साथ देण्याबरोबरच अभ्यासाबाबत सातत्याने मार्गदर्शन केल्याबद्दल त्याने त्यांचे विशेष आभार मानले. तसेच जिल्हा परिषद केंद्र शाळेतील सर्व शिक्षकांच्या मार्गदर्शनाचाही आपल्या यशात मोठा वाटा असल्याचे त्याने सांगितले.

त्यानंतर देवने भगवंतराव माध्यमिक तथा प्राथमिक आश्रमशाळेत इयत्ता आठवीत प्रवेश घेतला. येथे गणित विषयाचे वर्गशिक्षक सुदर्शन वासाडे यांनी त्याला नियमित गृहपाठ व सराव देत मार्गदर्शन केले. शिक्षक पात्रता परीक्षा उत्तीर्ण असलेल्या वासाडे सरांनी दिलेला गृहपाठ देवने कर्तव्यपूर्वक पूर्ण केला. त्यामुळे त्याच्या गणित विषयातील अभ्यासाला अधिक चालना मिळाली.

देवच्या या यशाबद्दल आश्रमशाळेचे मुख्याध्यापक टी. सी. ओड्नलवार, सर्व शिक्षक, आई-वडील तसेच ग्रामस्थांनी त्याचे अभिनंदन करून पुढील शैक्षणिक वाटचालीसाठी शुभेच्छा दिल्या. मेहनत, सातत्य आणि योग्य मार्गदर्शनाच्या बळावर ग्रामीण व आश्रमशाळेतील विद्यार्थीही स्पर्धात्मक परीक्षांमध्ये उल्लेखनीय यश मिळवू शकतात, हे देव गोंगलेच्या यशातून अधोरेखित झाले आहे.

गडचिरोलीतील २२ मिनी सेतू केंद्रांसाठी अंतिम पात्र-अपात्र यादी प्रसिद्ध

गडचिरोली : जिल्ह्यातील नागरिकांना विविध शासकीय व लोकाभिमुख सेवा गावपातळीवर उपलब्ध करून देण्यासाठी २२ मिनी सेतू केंद्रांमध्ये केंद्रचालकांची नियुक्ती प्रक्रिया राबविण्यात येत आहे. यामध्ये १३ ‘दादालोरा खिडकी’ आणि ९ ‘आदी सेवा केंद्रांचा’ समावेश आहे. या केंद्रचालक निवडीसाठी प्राप्त अर्जांची अंतिम पात्र व अपात्र यादी जिल्ह्याच्या अधिकृत संकेतस्थळावर प्रसिद्ध करण्यात आली आहे.

जिल्हाधिकारी अविश्यांत पंडा यांनी दिलेल्या माहितीनुसार, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता विभागाच्या ९ जुलै २०२६ रोजीच्या शासन शुद्धीपत्रकातील तरतुदींनुसार ही निवड प्रक्रिया राबविण्यात येत आहे. संबंधित उमेदवारांच्या अर्जांची छाननी करून अंतिम पात्र व अपात्र यादी तयार करण्यात आली आहे.

शासन शुद्धीपत्रकातील मुद्दा क्र. ७ (४) नुसार संबंधित उमेदवारांची पोलीस चारित्र्य पडताळणी करण्याची अट लागू राहणार आहे. त्यामुळे अंतिम यादी प्रसिद्ध झाल्यानंतरही नियमानुसार आवश्यक पडताळणी प्रक्रिया पूर्ण केली जाणार असल्याचे प्रशासनाने स्पष्ट केले आहे.

गावपातळीवर नागरिकांना पारदर्शक, सुलभ आणि गतिमान डिजिटल सेवा उपलब्ध करून देण्याच्या उद्देशाने मिनी सेतू केंद्रे अधिक सक्षम केली जात आहेत. अर्जदारांना अंतिम पात्र व अपात्र यादी गडचिरोली जिल्ह्याच्या अधिकृत संकेतस्थळावर gadchiroli.gov.in⁠� पाहता येणार आहे.